Dem Prügger Xandl zum 85. Geburtstag

Jå, griaß di Gott Xandl
beim Såndwirt im Gråbn,
du siachst mia san då,
brauchst es zwoamål net sågn.
Zum hochn Geburtståg,
des is uns jå klår,
san mia ålle kumman
im Familienchor

Den Xandl den kennt ma
im Mårkt und am Lånd,
åls Bierführer wår er
den Durstigen bekånnt.
Und håt er die Fassln
beim Wirtshaus åbglådn:
“A Bier und Gulasch
tat‘n jetzta net schådn”

Der Månn, der hoaßt Xandl
kånn ållerhand Såchn,
pflegt sauba den Gårtn
und kånn a guat – sogar vegetarisch – kochn.
Und oftmåls då ruaft er:
“Leitln heart’s,
heit kummt‘s schnell zu uns,
då gibt‘s Schwammerl mit Sterz”

Seine Ehe mit Sophie,
a långe Ewigkeit,
de siachst hålt überåll,
åba immer zu zweit.
Und wånn sie amål streitn
wegn Nix und Wiedernix,
då Xandl sågt versöhnlich:
“Passt schon, ålte Bix!”

Da Xandl håt Muskln
in die Oberårm drinnan,
sonst hätt er dås gånze Leben
net Fasslhebn kinnan,
und wånn er im Wåld
a feiste Buachn håt gsehgn,
lahnt er sich ån
und schon is da Bam glegn.

Am Bestn ist da Xandl,
wånn er schnåpst mit die Kårtn,
då brauchn die Gegner
auf‘s Bummerl net lång wårtn.
Und håt hålt da Xandl
amål a Mords Pech,
åls guata Valierer
zåhlt er gern dann die Zech.

Und kaum is der Xandl
im ålmerischen Lånd,
då siacht er a Hüttn
und hört an Gesång,
dånn is er schon drinnan
bschtellt schnell er a Hålbe
und singt a brav mit,
denn die Liada kennt er ålle.

Und jetzt hör ma hålt wieder
zan singen glei auf,
am Schluss kumman nur mehr
die Wünsche no drauf:
Liaba Xandl, bleib gsund
und munter-wohlauf,
dånn feier ma båld
den 90er drauf.

Und auf oans hätt ma båld
gråd no vergessn,
mia dånkn fürs Trinken
und a no fürs Essen.
Liaba Xandl, sei da sicher,
mir san heut guat drauf,
des Fassl, was ångschlågn ist,
des sauf ma heut aus.

Refrain:

Då droben auf den Bergen, då kennt er sich aus,
då kraxlt er gånz munta, recht steil hinauf!
Ob Summa oda Winta, ob‘s stürmt oda schneit,
is irgendwo a Gipfl, is da Xandl neamma weit.


Zum 85. Geburtstag des Bierführers Xandl Prügger im Gasthof Sandwirt am Kesselfall, 2/ 2019; Grundsätzlich sind alle hier veröffentlichten Inhalte urheberrechtlich geschützt und sämtliche Rechte vorbehalten.